Lög Félags heyrnarlausra
1. grein
Nafn félagsins er Félag heyrnarlausra, skammstafað Fh. Heimili félagsins og varnarþing er í Reykjavík.
2. grein
Félag heyrnarlausra starfar á landsvísu og er tilgangur félagsins eftirfarandi:
a) Að koma fram fyrir hönd heyrnarlausa og heyrnarskertra gagnvart opinberum aðilum í hverskyns hagsmunamálum, svo sem löggjöf og framkvæmd hennar og í dómsmálum er snerta rétt heyrnarlausra.
b) Að vinna að hverskonar menningar- og hagsmunamálum heyrnarlausra og heyrnarskertra, svo og styðja þá og deildir þeirra, sem félaginu er frekast fært. Fh er aðili að Norðurlandaráði heyrnarlausra, Öryrkjabandalagi Íslands, Alheimssamtökum heyrnarlausra og Evrópusambandi heyrnarlausra.
c) Efla starfsemi og samskipti milli deilda innan Fh og viðhalda starfsemi þeirra.
d) Að veita deildum og einstaka félagsmönnum liðsinni í baráttu fyrir afmörkuðum hagsmunamálum.
e) Að standa að fundum og ráðstefnum um málefni félagsmanna sinna og sækja slíka atburði erlendis.
3. grein
Félagsmaður er hver sá sem:
a) Fæðst hefur heyrnarlaus eða heyrnarskertur, misst hefur heyrn eða hefur verulega skerta heyrn, og að heyrnarleysið eða heyrnarskerðingin stafi ekki af ellihrumleika.
b) Greiðir félagsgjöld við inngöngu í félagið og síðan árleg félagsgjöld, eins og þau eru ákveðin af aðalfundi ár hvert.
c) Sem á lögheimili á Íslandi.
d) Félagsmenn undir 18 ára aldri geta ekki tekið sæti í stjórn eða hafa atkvæðisrétt á aðalfundum. Aðrir aðilar sem náð hafa 18 ára aldri geta orðið styrktarfélagar með málfrelsi og tillögurétt á fundum en eigi atkvæðisrétt og skulu ekki eiga sæti í stjórn félagsins, hvorki sem aðalmenn eða varamenn.
4. grein
Heimilt er að stofna deildir innan Félags heyrnarlausra sem hafa umsjón með afmarkaðri starfssemi innan félagsins. Í deildunum eru ekki starfandi sjálfstæðar stjórnir en tilnefna skal a.m.k. 2 umsjónarmenn sem halda utan um starfsemi viðkomandi deildar. Deildum innan Fh er ekki heimilt að fara í eigin fjáröflun en Fh mun, eins og efni standa til, styðja starfssemi deildanna. Umsjónarmenn deildanna skulu fyrir 1. nóvember hvert ár leggja fram til stjórnar Fh starfsáætlun ásamt fjárhagsáætlun um áætlaða starfssemi deildanna.
Hver sá getur orðið félagi að deild sem uppfyllir skilyrði samkvæmt 3. grein.
5. grein
Aðalfundur ár hvert ákveður félagsgjald í krónutölu. Félagsgjald skal vera jafnt fyrir alla og ganga eins fyrir alla. Þeir sem greiða félagsgjald eru þeir sem eru skilyrtir í 3. grein. Allir sem hafa greitt félagsgjald hafa kjörgengi, kosningarétt hafi þeir náð 18 ára aldri og eiga rétt á allri þjónustu sem félagið veitir. Þeir sem greitt hafa ársgjaldið eiga einir rétt á setu á aðalfundi svo framarlega sem félagsgjald hefur verið greitt fyrir aðalfund. Þeir sem eru undanþegnir ársgjaldi eru félagsmenn 60 ára og eldri. Framkvæmdastjóri eða aðrir úr stjórn sjá um innheimtu félagsgjaldsins.
6. grein
Stjórn félagsins skal skipuð fimm félagsmönnum og tveimur til vara. Varamenn taka sæti í stjórn í þeirri númeraröð sem þeir eru kosnir. Stjórn félagsins skal vera kosin til tveggja ára í senn, þannig að fyrra árið er kjörinn varaformaður, einn meðstjórnandi og fyrsti og annar varamaður. Hitt árið er formaður og tveir meðstjórnendur kosnir. Starfsmaður félagsins getur ekki boðið sig fram til stjórnar.
Formann félagsins skal kosinn sérstaklega á aðalfundi til tveggja ára í senn.
Formaður boðar til stjórnarfundar og stýrir stjórnarfundum.
7. grein
Stjórn félagsins er heimilt að víkja félagsmanni úr félaginu, verði félagsmaður sannur að því að vinna gegn tilgangi og hagsmunum félagsins. Brottvikning félagsmanns samkvæmt þessari grein tekur þegar gildi við stjórnarsamþykkt. Boða skal þó strax til almenns félagsfundar í framhaldi af slíkri stjórnarsamþykkt að beiðni a.m.k. 10 fullgildra félagsmanna. Félagsfundur getur með einföldum meirihluta atkvæða fellt brottvikningu félagsmanns úr gildi.
8. grein
Stjórn félagsins ræður framkvæmdastjóra félagsins, sem sjá skal um daglegan rekstur í samráði við stjórnina. Stjórnin skal sjá um aðrar mannaráðningar í samráði við framkvæmdarstjóra og einnig sjá um skipan fulltrúa í ráð og nefndir fyrir félagið. Við stjórnarákvarðanir ræður einfaldur meirihluti.
Framkvæmdastjóri situr stjórnarfundi, en hefur ekki atkvæðisrétt.
9. grein
Stjórnin má eigi selja né veðsetja fasteignir félagsins nema með samþykki aukins meirihluta almenns félagsfundar. Þó skal stjórninni heimilt að taka fyrir hönd félagsins nauðsynleg skammtímalán til dagslegs reksturs og í samræmi við tilgang félagsins og veðsetja eignir félagsins fyrir þeim. Stjórninni skal þó aldrei vera heimilt að taka hærri lán en sem svarar 10% af hreinu eigin fé félagsins, eins og það kom fram í síðasta endurskoðaða ársreikningi. Stjórninni er sömuleiðis óheimilt að selja eða láta af hendi aðrar eignir félagsins, hverju nafni sem þær nefnast, nema þeim verði varið í samræmi við tilgang félagsins skv. 2. gr.
10. grein
Framkvæmdastjóri er ásamt stjórn vörsluaðili sjóða og sinnir skrifstofuhaldi sem rekstri fylgir.
11. grein
Aðalfundur félagsins hefur úrslitavald í öllum málefnum félagsins og skal hann haldinn í síðasta lagi í maí ár hvert. Stjórn félagsins skal sjá um að auglýsa aðalfund tryggilega með a.m.k. 14 daga fyrirvara. Auglýsa skal aðalfund í Fréttabréfi heyrnarlausra, á auglýsingatöflu í húsnæði félagsins og inn á heimasíðu Fh á internetinu, nú vefslóðin www.deaf.is.
12. grein
Aðalfundur einn tekur ákvörðun um lagabreytingar. Sérhver félagsmaður hefur rétt til að leggja fyrir aðalfund tillögu um lagabreytingar eða aðrar tillögur er lúta að málefnum félagsins. Slíkar tillögur skulu þó aðeins lagðar fyrir, að þær hafi borist stjórn félagsins viku fyrir aðalfund. Stjórn félagsins er þó heimilt að víkja frá þessu frestsskilyrði ef sérstakar aðstæður mæla með.
Dagskrá aðalfundar skal vera þannig:
a) Formaður félagsins setur fundinn
b) Kosning fundarstjóra
c) Kosning ritara
d) Ritari les fundargerð síðasta aðalfundar
e) Endurskoðaðir reikningar fyrir síðasta almanaksár lagðir fram til samþykktar
f) Formaður les skýrslu stjórnar frá tímabili síðasta aðalfundar
g) Umræður um skýrslu stjórnar
h) Bornar upp tillögur er fyrir fundinn hafa verið lagðar
i) Kosning formanns félagsins og tveggja aðalstjórnarmanna eitt árið. Kosning formanns, eins aðalstjórnarmanns og tveggja varastjórnarmanna fer fram hitt árið skv. 6. gr.
j) Önnur mál.
13. grein
Aukaaðalfund skal halda eftir ákvörðun stjórnar eða ef 20 fullgildir félagsmenn bera fram skriflega ósk til stjórnar þar af lútandi.
14. grein
Ákvarðanir aðalfundar teljast löglegar ef þær eru teknar af einföldum meirihluta. Þó skulu ákvarðanir aðalfundar um að selja fasteignir félagsins og um meiriháttar veðsetningar á eignum félagsins háðar samþykki 2/3 atkvæðisbærra aðalfundarmanna. Ákvörðun aðalfundar um að leggja félagið niður telst ekki lögleg nema með samþykki 2/3 hluta atkvæðisbærra aðalfundarmanna.
15. grein
Stjórn félagsins skipar fulltrúa sína í ráð og nefndir á vegum félagsins skv. 7. gr. Stjórn félagsins getur því skipulagt og kallað til sérstakt fulltrúaþings 1-2 á ári eða eftir því sem tilefni gefur til kynna. Þeir sem eiga rétt til setu á fulltrúaþingi eru þeir einir sem sitja í stjórnum, ráðum og nefndum sem tengjast félaginu á einn eða annan hátt. Fulltrúaþingið markar stefnu félagsins á hverjum tíma og er fulltrúum félagsins í stjórnum, ráðum og nefndum ætlað að fara eftir stefnu Fulltrúaþingsins á hverjum tíma og vinna markvisst að því að koma stefnumálum í framkvæmd í sínu stjórnarráði og nefndarstarfi.
Fulltrúaþingið er samvinnu- og samráðsþing félagsins.
16. grein
Stjórn félagsins gerir áætlun um ferðakostnað erlendis. Áætlun fyrir næsta almanaksár skal lögð fram í nóvember ár hvert.
17. grein
Félagsmaður sem ferðast erlendis í þágu félagsins getur átt rétt á niðurgreiðslu ferðakostnað að hluta eða að öllu leyti. Hyggist félagsmaður nýta sér niðurgreiðslu ferðakostnaðar að einhverju eða öllu leyti ber honum að skila inn skriflegri skýrslu í síðasta lagi sex vikum eftir heimkomu. Skýrslan skal síðan birt á heimasíðu félagsins eigi síður en sjö vikum eftir heimkomu. Berist skýrsla ekki innan tímamarka hefur félagsmaður fyrirgert rétti sínum til niðurgreiðslu og verður fyrirfram greiddur ferðakostnaður þá afturkræfur.
Lög þessi voru samþykkt á aðalfundi Félags heyrnarlausra laugardaginn 6. júní 2009.
Stjórn Félags heyrnarlaursa:
Heiðdís Dögg Eiríksdóttir, formaður
Guðmundur Ingason, varaformaður
Kristín Friðriksdóttir, meðstjórnandi
Sunna Davíðsdóttir, meðstjórnandi
Magnús Sverrisson, meðstjórnandi
