Aðalfundur Félags heyrnarlausra
Aðalfundur Félags heyrnarlausra verður haldinn þriðjudaginn 23. maí næstkomandi í félagsheimili Félags heyrnarlausra að Þverholti 14, 105 Reykjavík.
Fundurinn hefst kl. 17:00 stundvíslega og stendur til kl. 20:00.
Léttar veitingar í boði.
Dagskrá fundarins samkvæmt lögum Félags heyrnarlausra er eftirfarandi:
Hefðbundin aðalfundarstörf
- Formaður félagsins setur fundinn
- Kosning fundarstjóra
- Kosning ritara
- Ritari les fundargerð síðasta aðalfundar
- Endurskoðaðir reikningar fyrir síðasta almanaksár lagðir fram til samþykktar
- Formaður les skýrslu stjórnar
- Umræður um skýrslu stjórnar
- Bornar upp tillögur er fyrir fundinn hafa verið lagðar
- Kosning:
- kosning tveggja aðalstjórnarmanna til tveggja ára
- kosning formanns til tveggja ára - Önnur mál
Tillögur um lagabreytingar eða framsögu á fundinum þurfa að berast stjórn Félags heyrnarlausra í síðasta lagi viku fyrir auglýstan aðalfund eða 16. maí 2017.
Samkvæmt samþykktum lögum félagsins 8. gr. liður c) skal framboðum til stjórnar skilað á skrifstofu, merkt aðalfundur 2017, kjörnefnd, eigi síðar en 21 degi fyrir boðaðan aðalfund eða 2. maí 2017.
Tillögur stjórnar Félags heyrnarlausra
Tillögur stjórnar Félags heyrnarlausra um breytingar á lögum félagsins lagðar fyrir aðalfund 23. maí 2017
Breytingartillaga nr. 1
Lögð er til breyting á 3. gr. í stað núgildandi 3. gr. komi ný grein svohljóðandi;
3. grein
Félagsmaður getur hver sá orðið sem uppfyllir eftirfarandi skilyrði:
a) Fæðst hefur heyrnarlaus eða heyrnarskertur, misst hefur heyrn eða hefur verulega skerta heyrn, svo fremi sem heyrnarleysið eða heyrnarskerðingin stafi ekki af ellihrumleika og sem reiðir sig á Íslenskt táknmál til tjáningar og samskipta.
b) Greiðir félagsgjöld við inngöngu í félagið og síðan árlega í samræmi við ákvörðun aðalfundar ár hvert.
c) Aðrir aðilar sem náð hafa 18 ára aldri geta orðið styrktarfélagar með málfrelsi og tillögurétt á fundum en eigi atkvæðisrétt og skulu ekki eiga sæti í stjórn félagsins, hvorki sem aðalmenn eða varamenn.
Núgildandi 3. grein hljóðar svo;
Félagsmaður getur hver sá orðið sem uppfyllir eftirfarandi skilyrði:
a) Fæðst hefur heyrnarlaus eða heyrnarskertur, misst hefur heyrn eða hefur verulega skerta heyrn, svo fremi sem heyrnarleysið eða heyrnarskerðingin stafi ekki af ellihrumleika.
b) Greiðir félagsgjöld við inngöngu í félagið og síðan árlega í samræmi við ákvörðun aðalfundar ár hvert.
c) Á lögheimili á Íslandi.
d) Aðrir aðilar sem náð hafa 18 ára aldri geta orðið styrktarfélagar með málfrelsi og tillögurétt á fundum en eigi atkvæðisrétt og skulu ekki eiga sæti í stjórn félagsins, hvorki sem aðalmenn eða varamenn.
Breytingartillaga nr. 2
Lögð er til breyting á 7. gr. þannig að d. liður 7. gr. falli niður
Breytingartillaga nr. 3
Lögð er til breyting á 9. gr. þannig að við 9. gr. bætist ný málsgrein svohljóðandi;
Fundargerð aðalfundar skal birt á heimasíðu félagsins innan tveggja vikna frá lokum aðalfundar. Þeir félagsmenn sem kunna að hafa athugasemdir við efni fundargerðar skulu koma þeim á framfæri við stjórn innan einnar viku frá birtingu fundargerðarinnar.
Ársskýrsla stjórnar 2017
Ársskýrsla starfsfólks 2017